ريم ابوزيد تكتب ” قوة الرفــــــض”

بصراحه باخد وقت في التفكير علشان اوصل هكتبلكم ايه .. وفي مواضيع كتير بتيجي في بالي بس ما بمسكش القلم والورقة واكتب الا اكتر حاجه قلبي حاسسها .. اصل اللي من القلب بيوصل للقلب علطول .. وبغض النظر انا بكتب باللغه العربيه ولا اللغه العاميه بس الاكيد ان قبل ما ايدي بتكتب وقبل ما عيني تقرأ الكلام اللي بكتبه قلبي بيحس بالكلام

مش هطول في الكلام اكتر من كده علشان ابدأ في موضوع لمسني جدا انهارده (قوة الرفض) يعني ايه قوة الرفض يعني انك ترفض حاجات انت في أمس الحاجه اليها علشان انت متأكد انها مش مناسبه ليك

عادل امام في لقاء تلفزيوني كان المذيع بيسأله ايه سبب نجاحك واستمرارك في النجاح ده قاله قوة الرفض .. الورق اللي مش بيعجبني برفضه حتى لو انا في امس الحاجه للشغل .. برفض علشان مش مناسب ليا .. وده طبعا مختلف عن ثقافة عبيلو واديلو اللي ماشيه دلوقتي اي حد بيعمل اي حاجه

اسامة منير ايام الضجه الجامده بتاعة البرنامج بتاعه اكتر جمله مشهوره  قالها واثرت فينا ” اذا اردت شيئا بشده فاطلق سراحه فان عاد اليك فانه ملك لك وان لم يعد فانه لم يكن من البدايه” قد ايه الجمله دي اثرت فينا وكنا بنستخدمها في مواقف كتير في حياتنا وده علشان نعزي نفسنا ونواسيها عن حاجه ضاعت مننا او ربنا مكتبهالناش

كتب تطوير الذات بتسمي الموضوع ده القدرة على قول (لا) يعني لو حد قالك نخرج انهارده مثلا والوقت مش مناسب بالنسبالك اوعى تنزل وتيجي على نفسك .. انت اولى بنفسك .. احسن انك تقول لا وتسيب الطرف التاني يتضايق مثلا .. بس تشتري نفسك ومصلحتك او شغلك .. لان وانت بتعمل اللي وراك محدش هييجي يقولك اساعدك او اعمله انا مكانك .. فكن لنفسك مش لغيرك

كل الكلام ده اللي ممكن ناس تشوفه مفيد وناس تشوفه هري الهدف منه ايه

اي حاجه بتتمناها وما حصلتش واي حاجه نفسك فيها ولسه مجتش وقدامك حاجه بديله ممكن تخليك تتنازل عن جزء من اللي بتتمناه او فيها تفاصيل قليله من اللي انت عايزها اوعى تقبل بيها .. واوعى تتنازل وده سواء كان في (شغل – صداقه – طريق نفسك تمشي فيه علشان توصل لهدف – علاقة ارتباط ) اوعى اوعى بجد تتنازل لان لو بدايتها تنازلات تخيل كده اخرها هيبقى ايه .. هتلاقي نفسك الايام بتاخد كل شويه حاجه من المزايا القليله اللي كنت شايفها وهتوصل ان كل المزايا اختفت

اثبت على موقفك بكل ما اوتيت من قوه اذا كنت متاكد ان هو ده احساسك وتفكيرك في الوقت ده .. ارفض اي حاجه تعكر مزاجك وما تحققش هدفك وتقلل طموحك وتحطم ثقتك في نفسك .. ارفض الطاقة السلبيه اللي التلفزيون والشارع واحيانا القريبين مننا بينقلوهالنا .. ارفض اي حاجه تغير من شخصيتك للاسوأ .. واتأكد ان قوتك في مدى قوة رفضك للي مش عاجبك في حياتك .. بس ركز حياتك بس مش حياة الناس